Kambi maniyan

കമ്പി മണിയൻ എന്ന പേരിൽ എന്റെ നാട്ടിൽ പ്രസിദ്ധനായ ഒരാളുണ്ട്. നാട്ടിലെ ഭൂരിപക്ഷം വരുന്ന കെട്ടിടങ്ങളുടെയും വാർക്കപണിയുടെ കമ്പി കെട്ടാണ് പുള്ളിക്ക് ഈ പേര് വീഴ്ത്താനുള്ള  കാരണം.
ജന്മനാ തന്നെ മണിയന്റെ ഇടതു കാലിനു ചെറിയ ഒരു വളവുണ്ട്. കമ്പികളുടെ പ്രാക്ക് എന്നാണു മണിയൻ ആശാരിയുടെ ഭാഷ്യം. ഈ വളവുകാരണം നടത്തത്തിൽ ഒരു ചെറിയ അലൈൻമെന്റ് പ്രശ്‍നമുണ്ടു. ഇടതു കാലിൽ ഉള്ള ചെരുപ്പ് പെട്ടെന്ന് വെട്ടി തേയും. അതുകൊണ്ടു ഈ കാലിൽ കൂടുതൽ ഭാരം കൊടുക്കാതിരിക്കാൻ നാട്ടിലുള്ള പട്ട ഷാപ്പിൽ കേറി പണ്ടുമുതലേ രണ്ടെണ്ണം രാവിലെ പിടിപ്പിച്ചും  നല്ല പൊയില ഞെട്ട് ചേർത്ത് ഒന്ന് മുറുക്കിയും ആണ് പണിക്കു പോകുക. പിന്നെ പുള്ളി പോകുക എയറിൽ ആണ്. തറയിൽകൂടി അല്ല.
എന്റെ ഒരു സുഹൃത്തിന്റെ ഏകദേശം മുപ്പതിനായിരം ചതുരം വരുന്ന കല്യാണ മണ്ഡപത്തിന്റെ കമ്പി കെട്ടു പണിയും മണിയന് കിട്ടി. സുഹൃത്തിന്റെ അച്ഛൻ വലിയ കണിശക്കാരൻ,വലിയ അബ്‌കാരി ,വലിയ വലിയ കുറെ സ്ഥാപനങ്ങളുടെ ഉടമ. പണിക്കാരെ വരച്ചവരയിൽ നിർത്തി കുഴപ്പക്കാരോട് വർത്തമാനത്തിൽ "പു"ലിംഗം വും "കു" ലിംഗവും കൂട്ടി നല്ല കട്ട സ്വരത്തിൽ  ആണ് മിക്കവാറും വർത്തമാനം.
പുള്ളി മണിയനെ  വിളിപ്പിച്ചു.
" എടാ മണിയാ നിനക്ക് എത്രദിവസം വേണമെടാ ഇത് നിനക്ക് തീർത്തു തരാൻ? "
മണിയൻ  വളഞ്ഞ കാലുമായി ഒന്നു ചുറ്റും ഓടി നടന്നു നോക്കി  വിനീത വിധേയനായി പറഞ്ഞു
" മുയലാളീ ഒരു നാല്പത്തെട്ടു മണിക്കൂർ,കൂടിപോയാ ഒരു അമ്പതു."
മുതലാളീ മണിയനെ സാകൂതം നോക്കി. മണിയന്റെ വളപ്പിന്റെ ഗുണഗണങ്ങൾ മണിയൻ തന്നെ പറഞ്ഞു കേൾപ്പിച്ചു.
മുതലാളി അടുത്ത തിങ്കൾ മുതൽ പണി നടത്താനുള്ള  അനുവാദവും കൊടുത്തു.
രണ്ടുദിവസം കഴിഞ്ഞാണ് മുതലാളി സ്ഥലം സന്ദർശിച്ചത്. പണി ഒരു ഇരുന്നൂറു ചതുരം പോലും തീർന്നിട്ടില്ല. ഷുഭിതനായ മുതലാളി മണിയനെ വിളിപ്പിച്ചു.
" ടാ മണിയാ  നീയല്ലേ പറഞ്ഞത് നാലപ്പത്തെട്ടു മണിക്കൂർ എന്ന് , എന്നിട്ടെന്താടാ ...#%%#€£% "
മണിയന്റെ സ്വതസിദ്ധമായ മറുപടി വന്നു.
" മുതലാളീ ഞാൻ പറഞ്ഞാ പറഞ്ഞതാ. നാൽപ്പത്തെട്ടു എന്നുപറഞ്ഞാ  നാല്പത്തെട്ടാ. പക്ഷെ ഞാൻ ഒരുദിവസം അഞ്ചുമണിക്കൂറേ  പണിയു ..."
TK